கெட்டு போக செய்யும் செத்த ஈக்கள்

செத்த ஈக்கள் தைலக்காரனுடைய பரிமளதைலத்தை நாறிக் கெட்டுப்போகப்பண்ணும்; ஞானத்திலும் கனத்திலும் பேர்பெற்றவனைச் சொற்ப மதியீனமும் அப்படியே செய்யும். – (பிரசங்கி 10:1).

ஒரு கிரேக்க அறிஞர் சிறு பிள்ளைகளுக்கு ஞானமாக கற்று கொடுப்பதில் தேர்ந்தவர். தன் பிள்ளைகளையும் நல்லவிதமாக வளர்த்து வந்தார். ஒழுக்கமற்றவர்களோடு பழகுவதை அவர் ஒருபோதும் அனுமதிக்க மாட்டார். ஒருமுறை அவரது பிள்ளைகள் விருந்து ஒன்றில் கலந்து கொள்ள அனுமதி கேட்டனர்.

அவரோ அங்கு சில நற்செயல்களற்றவை நடக்கும், கெட்ட பழக்கம் உள்ளவர்களும் அதில் கலந்து கொள்வார்கள் என்று அறிந்திருந்தபடியால் பிள்ளைகளுக்கு அனுமதி கொடுக்க மறுத்து விட்டார். அறிஞரது மகன், ‘நீங்கள் நினைப்பது போல ஆபத்தில் சிக்குவதற்கு நாங்கள் ஒன்றும் சிறு குழந்தைகள் அல்ல’ என்று கோபத்தோடு கூறினான்.

அவரோ எந்த வார்த்தையும் பேசாமல், வீட்டிலிருந்த ஒரு எரிந்த கரித்துண்டை எடுத்தார். அதை தன் மகனிடம் கொடுத்தார். மகன் கரித்துண்டை கையில் வாங்கின மாத்திரத்தில் கையெல்லாம் கறைபட்டது. கைதவறிய கரித்துண்டு அவனது வெள்ளை சட்டையிலும் விழுந்து கறைபடுத்தியது. ‘கரித்துண்டை கவனத்துடன் கையாள்வது ரொம்ப கஷ்டம் தான்’ என்று தகப்பனிடம் கூறினான் மகன். ‘கரித்துண்டு உன்னை சுட்டுவிடவில்லை, ஆனால் உன்னை கறைப்படுத்தி விட்டது என்பதை அறிந்து கொள்’ என்றார் தகப்பன்.

ஆம், எத்தனை உண்மை! தீயவர்களோடு பழகுவதால் நாம் உடனே தீயவர்களாக மாறுவதில்லை. ஆனால் அவை நம்மை கறைபட்டவர்களாக மாற்றி, காலப்பபோகிகில் நம்மையும் அத்தீய குணததிற்கு சொந்தக்காரர்களாக மாற்றிவிடும். ஆகவே தான் வேதம் கூறுகிறது, ‘கோபக்காரனுக்கு தோழனாகாதே, உக்கிரமுள்ள மனுஷனோடே நடவாதே, அப்படி செய்தால் நீ அவனுடைய வழிகளை கற்றுக்கொண்டு உன் ஆத்துமாவுக்கு கண்ணியை வருவிப்பாய்’ (நீதிமொழிகள் 22:24-25)என்று நம்மை எச்சரிக்கிறது.

அதைப்போல பண ஆசை உள்ளவர்களிடம் பழகி பாருங்கள், அவர்கள் அதை சேர்க்க வேண்டும், அதை கட்ட வேண்டும், இதை கட்ட வேண்டும் என்றே பேசுவார்கள். அதை கேட்டு கொண்டிருந்தால் நமக்கும், ஐயோ நான் ஒன்றும் சேர்த்து வைக்கவில்லையே, இனியாவது சேர்த்து வைப்போம் என்று எண்ணம் நம்மையும் அறியாமல் நமக்குள் வந்துவிடும். பின், சில வேளைகளில் எப்படியாவது நாமும் பணத்தை சேர்த்து வைக்க வேண்டும் என்று அதையே செய்து, கர்த்தர் பேரில் வைத்த நம்பிக்கையம் அற்றுப்போய் வீண் கவலைக்கும், பாரத்திற்கும் ஆளாகி விடுவோம்.

ஒருசிலர் எப்போது பார்த்தாலும் முறுமுறுத்து கொண்டே இருப்பார்கள். என்னதான் எல்லாம் நன்மையானதாக இருந்தாலும், ஏதாவது குறை கண்டுபிடித்து குற்றம் சொல்லி கொண்டே இருப்பார்கள். சிலவேளைகளில் நான் நினைப்பதுண்டு, வீட்டிலும் இப்படி சொல்லி கொண்டே இருந்தால், கணவனோ, மனைவியோ பாவம் என்று. அவர்களது குறைகளை கேட்டு கொண்டிருந்தால் நாமும் அவர்களோடு சேர்ந்து குறை சொல்ல ஆரம்பித்து விடுவோம்.

கர்த்தர் வெறுக்கும் இந்த காரியங்களை நம்மையும் அறியாமல் நாம் ஏற்படுத்தி கொண்ட நட்புகளால் செய்ய வேண்டிய நிலை ஏற்படலாம். ஒருவரையும் நாம் வெறுக்க கூடாது, ஆனால் அவர்கள் யார், எப்படிப்பட்டவர்கள் என்று அறிவதற்கு முன் நெருங்கிய நட்பு வைக்ககூடாது. அது ஆபத்தானது.

‘உன் நண்பன் யார் என்று சொல், நீ யார் என்று சொல்கிறேன்’ என்ற வாக்கு நம் சமுதாயத்தில் உண்டு. நல்ல நண்பர்களை பெற்று கொள்வோம். நண்பர்களாவதற்கு முன் அவர்கள் எப்படிப்பட்டவர்கள் என்பதை அறிந்தபின் நெருக்கம் கொள்வோம்.

‘துன்மார்க்கருடைய ஆலோசனையில் நடவாமலும், பாவிகளுடைய வழியில் நில்லாமலும், பரியாசக்காரர் உட்காரும் இடத்தில் உட்காராமலும்..’ என்று சங்கீதத்தில் (1:1) பார்க்கிறோம். அப்படி நாம் செய்யாமல் நம்மை தவிர்த்து கொண்டால், நம்மை கறைபடுத்தி கொள்ளாமல் காத்து கொள்ள முடியும். கர்த்தர் விரும்பும் பாத்திரமாக முடியும். எல்லாவற்றிற்கும், எல்லாருக்கும் மேலாக நல்ல
நண்பராம் இயேசுவை நம்மோடு சேர்த்து கொள்வோம். அவரை நம்முடைய நல்ல நண்பராக வைத்து கொள்வோம். அவர் நல்ல ஆலோசனை தருவார், நம்மை நல் வழியில் நடத்துவார். ஆமென் அல்லேலூயா!

நல்ல நண்பன் இயேசு என்னை என்றும் காப்பார்
கைவிடாமலே காத்து நடத்துவார்
கண்மணி போல காப்பார் கண்ணீரெல்லாம் துடைப்பார்
கடந்தெல்லாம் மறக்க செய்வார்

மாயையே இந்த உலகம் மாயையே
மாயையே உலகில் எல்லாம் மாயையே
போதுமே இயேசு ஒருவர் போதுமே
போதுமே இயேசு மட்டும் போதுமே

ஜெபம்: எங்கள் அன்பின் பரலோக தகப்பனே, நாங்கள் நண்பர்களாக நினைத்திருக்கும் அநேகர் எங்கள் துன்ப நேரங்களில், துக்க நேரங்களில் எங்களை விட்டு விலகியிருக்கலாம், ஆனால் நாங்கள் நல்ல நண்பராம் இயேசுவை ஏற்று கொண்டு, அவர் கொடுக்கும்
ஆலோசனையின்படி நடக்க கிருபை செய்யும். கெட்ட நண்பர்களுக்கும், கெட்ட யோசனைகளுக்கும், கெட்ட பழக்க வழக்கங்களுக்கும் எங்களை விலக்கி காத்து கொள்ளும். அப்படி நீர் எங்களை காத்து கொள்ள போவதற்காக உமக்கு நன்றி. இயேசுகிறிஸ்துவின் நாமத்தில் ஜெபிக்கிறோம் நல்ல தகப்பனே ஆமென்.

பிரித்தெடுத்த தேவன்

தேவன் நம்முடைய கிரியைகளின்படி நம்மை இரட்சிக்காமல், தம்முடைய தீர்மானத்தின்படியும், ஆதிகாலமுதல் கிறிஸ்து இயேசுவுக்குள் நமக்கு அருளப்பட்ட கிருபையின்படியும், நம்மை இரட்சித்து, பரிசுத்த அழைப்பினாலே அழைத்தார். – (2 தீமோத்தேயு 1:9).

நைஜீரியாவை சேர்ந்த ஒரு பெற்றோருக்கு இரட்டை பெண் குழந்தைகள் ஒட்டியபடி பிறந்தன. குழந்தைகள் தண்டுவடம் பக்கத்தில் ஒட்டியிருந்தன. அறுவை சிகிச்சை செய்து இருவரையும் பிரிப்பது மிகவும் கடினம் என்றும் அப்படி செய்தால் ஒரு குழந்தை இறக்கலாம் என்றும், அப்படி அந்த அறுவை சிகிச்சை செய்தாலும், ஏராளமான பணம் செலவிட வேண்டும் என்று மருத்துவர்கள் கூறினர். அதனால் பெற்றோர் இந்த எண்ணததை கைவிட்டு, குழந்தைகளுக்கு ஹசானா, ஹூசைனா என பெயரிட்டு வீட்டிலேயே வளர்த்து வந்தனர்…

என்றாவது ஒரு நாள் இந்த இரு குழந்தைகளும் இறந்து விடும் என்று நினைத்து கொண்டிருக்கையில், ஒரு நல்ல மனிதர் அறுவை சிகிச்சைக்கான முழு செலவையும் தான் ஏற்று கொள்வதாக அறிவித்து, இந்தியாவில் இப்படிப்பட்ட அறுவை சிகிச்சை செய்வதால் டெல்லியிலுள்ள பி.எல். கப்பூர் என்னும் மருத்துவமனைக்கு அனுப்பி வைத்தார்.

மருத்துவர்களுக்கு இந்த அறுவை சிகிச்சை பெரும் சவாலாக அமைந்தது. அதை மூன்று கட்டங்களாக செய்ய தீர்மானித்தனர். அதன்படி அவர்கள்; தாங்கள் எப்படி அந்த சிகிச்சையை செய்ய போகிறோம் என்று முதலாவது ஒரு பொம்மைக்கு செய்து பார்த்தனர். ஆதன் பின்னர் டாக்டர் பிரசாந்த் ஜெயின் என்பவர் தலைமையில் மூன்று மாதங்கள் ஒவ்வொரு நாளாக குறிக்கப்பட்டு, இரு பிள்ளைகளையும் வெற்றிகரமாக பிரித்து எடுத்தனர்.

அப்பிள்ளைகளின் முதலாம் பிறந்த நாளை மருத்துவமனையிலேயே விசேஷவிதமாக கொண்டாடினர். இநத அறுவை சிகிச்சை நடைபெற மொத்தம் பதினெட்டு மணி நேரம் ஆனது. மொத்த செலவு 64 லட்சம் ரூபாய்கள். மொத்தம் நாற்பதுக்கும் மேலான நிபுணர்கள் சேர்ந்து இந்த சிகிச்சையை வெற்றிகரமாக முடித்தனர். பிள்ளைகள் இருவரையும் பெற்றோர் சந்தோஷமாக தங்கள் தாய் நாட்டிற்கு கொண்டு சென்றனர்.

இதோ, நான் துர்க்குணத்தில் உருவானேன்; என் தாய் என்னைப் பாவத்தில் கர்ப்பந்தரித்தாள் (சங்கீதம் 51:5) என்ற வசனத்தின்படி நாம் பிறக்கும்போதே பாவம் நம்மில் ஒட்டி கொண்டிருக்கிறது. எந்த சிறுபிள்ளைக்கும், யாருக்கும் தெரியாமல் அதற்கு பிடித்த உணவு பண்டத்தை எடுத்து சாப்பிடும்படி சொல்லி கொடுப்பதில்லை, ஆனால் அது எடுத்து சாப்பிடுகிறது. இப்படி எத்தனையோ காரியங்களை நாம் சிறுபிள்ளைகளிடத்தில் காண்கிறோம். நீதிமான் என்று சொல்லி கொள்ள யாரும் இல்லை. எல்லாரும் பாவம் செய்து ஏகமாய் கெட்டு போனோம் என்று வசனம் சொல்லுகிறது.

ஆனால் நாம் பாவத்திலேயே இருக்க வேண்டிய அவசியம் இல்லை. நம் பாவத்தை கழுவி கொள்ள நாம் எங்கேயும் போய் குளிக்கவோ, கிரியைகளை செய்யவோ அவசியமே இல்லை. நம் கிரியைகளினால் அந்த பாவங்கள் நம்மை விட்டு அகல்வதும் இல்லை. ஒரு வேளை கிரியைகளை செய்து பாவங்கள் நம்மை விட்டு அகன்று போனது என்று நினைக்கிற நாம், நாம் மீண்டும் அதே பாவத்தில் ஈடுபட்டு நம்மை அழுக்காக்கி கொள்கிறோம்.

நம் பாவத்தை போக்க, கிறிஸ்து நமக்காக தம் சொந்த இரத்தத்தை சிந்தி நம்மை மீட்டெடுத்தார் என்பதே நற்செய்தி. யார் யாரெல்லாம் அந்த விலையேற பெற்ற இரத்தத்தால் கழுவப்பட வேண்டும் என்று வாஞ்சிக்கிறார்களோ அத்தனை பேருடைய பாவங்களையும் நீக்கி சுத்திகரிக்க இயேசுகிறிஸ்துவின் இரத்தம் வல்லமையுள்ளதாக இருக்கிறது.

அந்த நல்ல மனிதர் அறுவை சிகிச்சைக்கான முழு செலவையும் தானே ஏற்று கொண்டது போல இயேசுகிறிஸ்துவும் நம் பாவங்களிலிருந்து நம்மை பிரித்தெடுக்க இரட்சிப்பை இலவசமாக கொடுத்திருக்கிறார். ஆனால் யார் அதை விசுவாசத்தோடு ஏற்று கொண்டு இயேசுவே என் பாவங்களை கழுவும் என்று சொல்கிறார்களோ அவர்களே இரட்சிப்பை பெற்று கொள்கிறார்கள்.

இயேசுகிறிஸ்துவின் பாவமற்ற, விலையேறப்பெற்ற இரத்தத்தால் கழுவப்பட நம்மை ஒப்புக்கொடுப்போமா? இயேசுகிறிஸ்துவின் இரத்தம் சகல பாவங்களையும் நீக்கி நம்மை சுத்திகரிக்கும். ஆமென் அல்லேலூயா!

பாவ மன்னிப்பின் நிச்சயத்தை பெற்று கொள்ள வேண்டும்
பரலோகத்தில் ஓரிடம் நீ பெற வேண்டும்
இயேசு தருகிறார் இன்று தருகிறார்
அதற்காகத்தான் சிலுவையிலே இரத்தம் சிந்தி விட்டார்

ஜெபம்: எங்கள் அன்பின் நேச தகப்பனே எங்கள் பாவங்களை போக்க நாங்கள் எந்த கிரியையும் செய்ய வேண்டாமல், இயேசுகிறிஸ்துவின் இரத்தத்தை விசுவாசித்து கழுவப்பட எங்கள் இருதயங்களில் கிரியை செய்யும். எங்கள் பாவங்களை இயேசுகிறிஸ்துவின் இரத்தத்தினால்; கழுவப்பட ஜெபிக்கிறோம். எங்களுக்காக தம்முடைய சொந்த இரத்தத்தை சிந்தி எங்களுக்கு இரட்சிப்பை இலவசமாக பெற்று தந்த இயேசுகிறிஸ்துவின் அன்பை நினைத்து அவரை துதிக்கிறோம். எங்கள் ஜெப விண்ணப்பங்களை இயேசுகிறிஸ்துவின் இனிய நாமத்தில் ஜெபிக்கிறோம் நல்ல தகப்பனே ஆமென்.

அந்நிய நுகம்

அந்நிய நுகத்திலே அவிசுவாசிகளுடன் பிணைக்கப்படாதிருப்பீர்களாக; நீதிக்கும் அநீதிக்கும் சம்பந்தமேது? ஒளிக்கும் இருளுக்கும் ஐக்கியமேது? கிறிஸ்துவுக்கும் பேலியாளுக்கும் இசைவேது?அவிசுவாசியுடனே விசுவாசிக்குப் பங்கேது?. – (2 கொரிந்தியர் 6:14-15).

காலங்கள் மாறி கொண்டிருக்கின்றன. இளைஞர்கள் ஒரு கணவனை அல்லது மனைவியை தெரிந்தெடுப்பதில் தங்களுடைய சுய விருப்பத்தை நிறைவேற்றவே விரும்புகின்றனர். தங்களுடைய பூரண வளர்ச்சியடையாத
பருவத்தில் அவர்கள் அழகை, வசீகரத்தை அல்லது செல்வத்தை தங்கள் வாழ்க்கை துணையிடம் எதிர்ப்பார்க்கின்றனர். ஒரு இளைஞன் தன் வாழ்க்கை துணையை தெரிந்தெடுக்கும்போது எவ்விதமான
குணாதிசயங்களை எதிர்பார்க்க வேண்டும், பெற்றோரும் எவ்வித குணாதிசயங்களை மனதில் கொண்டு வரன் பார்க்க வேண்டும் என்பதையும் காண்போம்.

வாழ்க்கை துணை ஒரு பக்தியுள்ள கிறிஸ்தவனாக இருக்க வேண்டுமென்ற எண்ணமே முதலும் எல்லாவற்றிற்கும் மேலானதுமாக இருக்க வேண்டும். ஒரு பெண் ஒரு மனிதனை பார்த்து அவரை வாழ்க்கை துணையாக தீர்மானிக்கும் முன் கீழ்கண்ட கேள்விகளை கேளுங்கள், இந்த மனிதன் ஒரு கிறிஸ்தவரல்ல என கருதுகிறேன். இவர் எவ்வித பழக்கங்களை கொண்டிருப்பார்? என் குடும்பத்திற்கு சமாதானத்தை கொண்டு வருவாரா? அல்லது சண்டையை கொண்டு வருவாரா? மது அருந்துவாரா? புகை பிடிப்பாரா? என்று தெரிந்து கொள்ளுதல் மிகவும் அவசியம். அதை மற்றவரிடம் கேட்டு தெரிந்து கொள்ளலாம்.

ஒரு கிறிஸ்தவனுக்கு தேவனே வாழ்வின் மையம், அடுத்ததாக வாழ்க்கை துணை. தேவனுக்கு எதிலும் இடம் கொடுக்காதவரானால் அது எப்பேர்ப்பட்ட மன வேறுபாடுகளையும் வேதனைகளையும் உருவாக்கும்!
ஆகவே கிறிஸ்தவரல்லாத ஒருவரை நேசிக்க ஆரம்பிக்குமுன், உறவாட ஆரம்பிக்குமுன், கிறிஸ்தவ பெண்களும், ஆண்களும் சிந்தித்து, அந்நிய நுகத்திலே அவிசுவாசிகளுடன் பிணைக்கப்படாதிருப்பீர்களாக என்ற வசனத்தை நினைவுகூர்ந்து, எச்சரிக்கையுடன் இருக்க வேண்டும். காதலுக்கு கண்ணில்லை என்று சொல்லி, பின்னர் வாழ்நாளெல்லாம் கண்ணீர் வடித்து கொண்டிருக்க வேண்டாம்!

எனது உறவின் பெண் வேறு மதத்தில் உள்ள வாலிபனை காதலித்து திருமணம் செய்ய முடிவு செய்தாள். அவனிடம் ‘நீ கிறிஸ்தவனாக மாறினால், நான் உன்னை திருமணம் செய்து கொள்வேன்’ என கூறவே, அவனும் ஒத்து கொண்டு, ஞானஸ்நானம் எடுத்து, கிறிஸ்தவ முறைப்படி திருமணம் செய்தான். திருமணம் முடிந்து, அந்த பெண் அந்த வாலிபனின் வீட்டில் காலடி எடுத்து வைத்தபோது, அந்த பையனின் பெற்றோர், ‘எங்கள் சுவாமி கோயிலில் நீ திருமணம் செய்தே ஆக வேண்டும்’ என்று சொல்லி, அவளை கோயிலுக்கு கூட்டி சென்று, அங்கு மந்திரங்களை ஓதி, அந்த பையன் அவளுடைய கழுத்தில் தாலி கட்டினான். ஒரு பிள்ளையும் பிறந்தது. அவர்கள் வீட்டில், அந்த பெண் கோயிலுக்கு சென்று வழிபட வேண்டும் என்று வற்புறுத்தல். அவளால் முடியாது போகவே இப்போது இருவரும் பிரிந்து வாழ்ந்து கொண்டிருக்கிறார்கள். இது கற்பனை கதையல்ல, உண்மை சம்பவம்!

ஒரு ஆண் ஒரு பெண்ணை பார்த்து அவளை வாழ்க்கை துணையாக்க தீர்மானிக்குமுன் கீழ்க்ணட கேள்விகளை கேளுங்கள். இந்த பெண் என்னுடைய பிள்ளைகளுக்கு தாயாகி, நாள் முழுவதும் அதிக நேரம் அவர்களோடிருப்பாள், ஆனால், கிறிஸ்துவை அறியாதவளாக இவள் இருக்கும் பட்சத்தில் பிள்ளைகளுக்கு ஆவிக்குரிய காரியங்களை குறித்து
எப்படி கற்பிப்பாள்? மேலும் நான் அவளை கிறிஸ்துவுக்கு ஆதாயப்படுத்த முடியவில்லை என்றால் நித்திய ஜீவனுக்கேதுவான நம்பிக்கையில்லாத அவளுடைய வாழ்வையும், மரணத்தையும் பார்ப்பது மிகவும் வேதனை
நிறைந்த காரியமாக இருக்குமே என சிந்தியுங்கள்.

கிறிஸ்தவர்களில் பத்தில் எட்டுபேர் கிறிஸ்தவரல்லாதோரை திருமணம் செய்து கடைசியில் தேவனையும் சபையையும் விட்டு விலகி போகின்றனர் என புள்ளி விவரம் ஒன்று கூறுகிறது. என்னோடு படித்த ஒரு வாலிபன் கர்த்தருக்காக வைராக்கியமாக நின்றவன், கிறிஸ்தவரல்லாத ஒரு பெண்ணை திருமணம் செய்து, விசுவாசத்தை விட்டே விலகி போனான்! என்ன பரிதாபம்! அவனுக்காக கண்ணீர் விட்டு ஜெபிப்பதை தவிர என்ன செய்ய முடியும்?

நான் நடந்து செல்ல திட்டமிட்டிருக்கும் நிலப்பகுதியில் கண்ணிவெடி வைக்கப்பட்டிருக்கிறது என்பதை நான் அறிந்தால் நான் அதற்கப்பாலேயே நின்று விட மிக கவனமாயிருப்பேன். அது போல கிறிஸ்தவரல்லாத துணையை தெரிவு செய்தவர்களில் அநேகர் தேவனை விட்டே விழுந்து போயிருக்கிறார்கள் என்பதை அறியும்போது, அதே தவறை நாம் செய்யக்கூடாதல்லவா?

பிரியமானவர்களே, நீங்கள் ஒரு பக்தியுள்ள கிறிஸ்தவரை திருமணம் செய்தால் கர்த்தருக்குள் இணைந்து வல்லமையாக பலப்பட்டு வளருவீர்கள். முக்கியமாக உங்கள் சந்ததியை விலையேறப்பெற்ற விசுவாசத்திற்குள் கொண்டு வருவீர்கள். ஆனால் மதம் முக்கியமானதல்ல என்று கிறிஸ்தவரல்லாத ஒருவரை இனக்கவர்ச்சியினால் திருமணம் செய்தால் உங்களுடைய ஆத்துமாவிற்கும், பிள்ளைகளின் ஆத்துமாவிற்கும் தனக்கு பின்வரும் சந்ததிகளுக்கும் நித்திய அழிவை கொண்டு வந்து விடுவீர்கள். ஆகவே தயவு செய்து உங்கள் தீர்மானத்தை மறுபரிசீலனை செய்யுங்கள்.

கர்த்தர் உங்களை நேசிப்பதால் இந்த கட்டுரையை உங்களுக்கு வெளிப்படுத்தியிருக்கிறார். கர்த்தருடைய வார்த்தைக்கு செவிகொடுத்து, ஆசீர்வாதத்தை பெற்று கொள்ளுங்கள். கர்த்தரால் ஆசீர்வதிக்கப்பட்ட குடும்பமாக சங்கீதம் 128ன்படி, ‘உன் மனைவி உன் வீட்டோரங்களில் கனிதரும் திராட்சக்கொடியைப்போல் இருப்பாள்; உன் பிள்ளைகள் உன் பந்தியைச் சுற்றிலும் ஒலிவமரக் கன்றுகளைப்போல் இருப்பார்கள். இதோ, கர்த்தருக்குப் பயப்படுகிற மனுஷன் இவ்விதமாய் ஆசீர்வதிக்கப்படுவான்’ என்று ஆசீர்வாதத்தோடு வாழ வாழ்த்துகிறோம். ஆமென் அல்லேலூயா!

மனைவி கனிதரும் திராட்சைச் செடி
பிள்ளைகள் ஒலிவக் கன்றுகள் போல்
இல்லத்தில் மகிழ்ந்து வாழ்வார்கள்
இடைவிடாமல் ஜெபிப்பார்கள்

கர்த்தரை நம்பினோர் பேறுபெற்றோர்
சீயோன் மலைபோல் உறுதியுடன்
அசையாமல் இருப்பார்கள்

ஜெபம் : எங்களை அதிகமாய் நேசித்து வழிநடத்தும் நல்ல தகப்பனே, இன்றைய வாலிபர்கள், தங்கள் சொந்த இச்சைகளின்படி, தங்கள் துணையை தெரிந்து கொள்ளாமல், வேத வாக்கியங்களின்படி தெரிந்து கொள்ள உதவி செய்யும். அந்நிய நுகத்திலே அவிசுவாசிகளுடன் பிணைக்கப்படாதிருப்பீர்களாக,
அவிசுவாசியுடனே விசுவாசிக்குப் பங்கேது? என்னும் வசனத்தை நினைவுகூர்ந்து, அதற்கு கீழ்ப்படிய கிருபை தாரும். தங்கள் வாழ்க்கை கர்த்தருக்கு பிரியமானதாக இருக்கும்படி, தங்களுக்கு பின்வரும் சந்ததிக்கு ஆசீர்வாதமானவர்களாக இருக்கதக்கதாக நல்ல துணைகளை தெரிந்து கொள்ள அவர்களுக்கு கிருபை செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

கீழே இழுக்கும் பாரம்

ஆகையால், மேகம்போன்ற இத்தனை திரளான சாட்சிகள் நம்மைச் சூழ்ந்துகொண்டிருக்க, பாரமான யாவற்றையும், நம்மைச் சுற்றி நெருக்கிநிற்கிற பாவத்தையும் தள்ளிவிட்டு, விசுவாசத்தைத் துவக்குகிறவரும் முடிக்கிறவருமாயிருக்கிற இயேசுவை நோக்கி, நமக்கு நியமித்திருக்கிற ஓட்டத்தில் பொறுமையோடே ஓடக்கடவோம். – (எபிரேயர் 12:1).

ஒரு கப்பல் நடுக்கடலில் மூழ்க ஆரம்பித்தது. அது தங்கக்கட்டிகளை ஏற்றி சென்ற கப்பல். அதில் பயணம் செய்த ஒவ்வொருவரும் உயிர் தப்புவதற்காக அமிழ்ந்துக் கொண்டிருந்த கப்பலிலிருந்து குதித்து, நீந்த ஆரம்பித்தனர். அதில் ஒருவனுக்கு அந்த கப்பலிலுள்ள தங்கத்தின் மேல் ஒரு கண். அவன் ஒரு நல்ல நீச்சல் வீரன். எல்லோரும் குதித்தபிறகு, அவன் தங்கக்கட்டிகளில் சிலதை எடுத்து, தன் இடுப்பில் கட்டிக் கொண்டான். இவற்றை கஷ்டப்பட்டு, கரையில் சேர்த்து விட்டால் இதை விற்று தான் வாழ்க்கை முழுவதும் எவ்வளவு செல்வந்தனாய் வாழலாம் என்று கற்பனை செய்தான்.

இடுப்பை சுற்றியுள்ள தங்கக்கட்டிகளோடு கடலில் குதித்து நீந்த முயன்றான். முடியவில்லை. தங்கக்கட்டிகளின் கனம் அவனை கீழே இழுத்தது. அவனை தண்ணீரின் ஆழத்திற்குள் இழுத்தது. ஒரு நொடியில் அவன் சுதாரித்தவனாய் இடுப்பிலுள்ள ஒவ்வொரு கட்டியாக தூக்கி எறிய ஆரம்பித்தான். இறுதியில் தன் உயிருக்கே ஆபத்தை கொண்டு வரும் தங்கக்கட்டிகள் ஒன்றுக் கூட தன்னிடமில்லாதவாறு அனைத்தையும் எறிந்தான். பாரம் நீங்கி இலகுவானவனாக கடலில் நீந்தி கரை சேர்ந்தான்.

ஆம், பாரமான யாவற்றையும் தள்ளிவிட்டால் தான் நாம் ஓட்டத்தில் வெற்றியாய் ஓடி முடிக்க முடியும். பாரத்திலெல்லாம் பெரிய பாரம் பாவ பாரமாகும். இந்த பாவபாரத்தோடு சேர்ந்து கிறிஸ்தவ வாழ்க்கை என்னும் ஓட்டத்தில் ஓடவே முடியாது. இந்த பாவபாரம் நம்மை இழுத்து இருளில் தள்ளிவிடும். அப்படியென்றால் நாம் செய்ய வேண்டிதென்ன? எந்த பாவம் நம் கிறிஸ்தவ வாழ்வின் ஓட்டத்திற்கு தடையாயிருக்கிறது என்று சிந்திக்க வேண்டும். பொருளாசை என்னும் பாவமா, கண்களின் இச்சை என்னும் பாவமா, ஜீவனத்தின் பெருமையா? வெளிப்படையாக தெரியாத எந்த பாவபாரம் உங்களை இழுக்கிறது என்று சிந்திக்க வேண்டும். அதை நம்மை விட்டு நீக்கி விட தேவ தயவையும், வேத வசன சுத்திகரிப்பையும் நாட வேண்டும். பரிசுத்த ஆவியானவரின் கிருபையை பெற்றுக் கொள்ள வேண்டும். ஆவியானவர் எங்கே உண்டோ அங்கே விடுதலை உண்டு என்று வசனம் கூறுகிறதல்லவா! அவர் தரும் விடுதலை இவ்வுலக வாழ்வில் மட்டுமல்ல, மறுமை வரை நம் ஆத்துமாவை காப்பாற்றும்.

இன்னும் சிலருக்கு குடும்பத்தைப் பற்றிய பாரம், பிள்ளைகளைப் பற்றிய பாரம், வேலைகளை குறித்த பாரம் என பலவகையான பாரங்களை சுமந்து சுமந்து களைத்து போகிறார்கள். அதனிமித்தம் அனுதினமும் தேவனோடு ஐக்கியம் கொள்ளும் நேரத்திலும் குறைந்து போய் விடுகிறார்கள். நம்மில் அநேகர் நினைக்கிறோம், நான் இல்லாவிட்டால், நம் குடும்பத்தை யாருமே கவனிக்க முடியாது என்று. என்னோடு வேலை செய்யும் ஒரு சகோதரி, தன் வேலையில் தன் பிள்ளைகளை மேற்படிப்பு படிக்க வைக்க, தான் வேலை செய்யும் இடத்திலிருந்து கொஞ்சம் அதிக பணம் கிடைக்கும் மாற்றல் கேட்டு வாங்கி சென்றார்கள். தன்னுடைய சம்பாத்தியம் மிக முக்கியம், அது இல்லாமல் பிள்ளைகளை படிக்க வைக்கவே முடியாது என்று நினைத்தார்கள். ஆனால் அங்கு போன சில மாதங்களில், பாத்ரூமிற்கு போனவர்கள் திரும்ப வரவே இல்லை. கதவை உடைத்து பார்த்தபோது, அவர்கள் மரித்துக் கிடந்தார்கள். அந்த சகோதரிக்கு எந்த வியாதியும் இருந்ததில்லை. நம்மில் யாரும் சொல்ல முடியாது, நான் இத்தனை சம்பாதிப்பேன், என் பிள்ளைகளை இப்படி படிக்க வைப்பேன் என்று.

பிள்ளைகளுடைய எதிர்காலத்திற்காக திட்டங்கள் தீட்டுவது நல்லது. ஆனால் நான் இல்லாவிட்டால் எதுவும் நடக்காது என்று நாம் நினைக்கவே முடியாது. நாளை என்ன நடக்கும் என்று நமக்கு தெரியாது. கர்த்தர் நமக்கு கொடுக்கும் நாட்கள் வரை அவருக்காக வாழ்வோம். நம்மை சுற்றி நிற்கிற பாரமான காரியங்களையும், பாவத்தையும் தள்ளி விட்டு, நம் பாரங்கள் அனைத்தையும் கர்த்தர் மேல் வைத்து விட்டு, இலகுவாய் தேவன் நமக்கு நியமித்த ஓட்டத்தில் பொறுமையோடு ஓடி ஜீவ கிரீடத்தை பெற்றுக் கொள்வோமா? ஆமென் அல்லேலூயா!

சூழ்ந்து நிற்கும் சுமைகள்
நெருங்கி பற்றும் பாவங்கள்
உதறி தள்ளிவிட்டு
ஓடுவோம் உறுதியுடன்

கண்களை பதிய வைப்போம்
கர்த்தராம் இயேசுவின் மேல்
கடந்ததை மறந்திடுவோம்
தொடர்ந்து முன் செல்லுவோம்

ஜெபம் : எங்கள் அன்பின் பரலோக தகப்பனே, எங்களை சுற்றி நிற்கும் பாவங்களை நாங்கள் உதறிவிட்டு, நாங்கள் கஷ்டப்பட்டு சுமந்து கொண்டிருக்கிற பாரமான காரியங்களை உம்முடைய பாதத்தில் வைத்துவிட்டு, நீர் நியமித்திருக்க ஓட்டத்தில் அவசரமாக அல்ல, பொறுமையோடு ஓடி முடிக்க கிருபை செய்யும். ஜீவ கிரீடத்தை பெறுகிறவர்களாக நாங்கள் ஓட உதவி செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

ரெகொபோத் – Rehoboth

பின்பு அவ்விடம்விட்டுப் பெயர்ந்துபோய், வேறொரு துரவை வெட்டினான்; அதைக்குறித்து அவர்கள் வாக்குவாதம் பண்ணவில்லை; அப்பொழுது அவன்: நாம் தேசத்தில் பலுகும்படிக்கு, இப்பொழுது கர்த்தர் நமக்கு இடம் உண்டாக்கினார் என்று சொல்லி, அதற்கு ரெகொபோத் என்று பேரிட்டான். – (ஆதியாகமம் 26:22).

ஈசாக்கு துரவை வெட்டியபோது அங்கு அவனுக்கும் அங்கிருந்த மேய்ப்பர்களுக்கும் வாக்குவாதம் உண்டானது. அந்த காலத்தில் ஈசாக்குக்கு இருந்த ஆட்டு மந்தைகளுக்கும் மாட்டு மந்தைகளுக்கும் நீர் கொடுக்க அவனுக்கு அந்த நேரத்தில் நல்ல தண்ணீர் சுரக்கும் துரவு மிகவும் அத்தியாவசிய தேவையாயிருந்தது. அது இல்லாதபடிக்கு அவனுடைய மந்தைகள் மரித்து போகும். அதனால் அவன் மூன்று துரவுகளை (கிணறுகளை) தொடர்ந்து தோண்ட வேண்டிய கட்டாயம் ஏற்பட்டது.

‘தன் தகப்பனாகிய ஆபிரகாமின் நாட்களில் வெட்டினவைகளும், ஆபிரகாம் மரித்தபின் பெலிஸ்தர் தூர்த்துப்போட்டவைகளுமான துரவுகளை மறுபடியும் தோண்டி, தன் தகப்பன் அவைகளுக்கு இட்டிருந்த பேர்களின்படியே அவைகளுக்குப் பேரிட்டான்’  (வசனம் – 18). ஈசாக்கு பெலிஸ்தர் தூர்த்து போட்ட தன் தகப்பனுடைய துரவுகளை மீண்டும் தோண்டியபோது, பெலிஸ்தர்கள் அதை குறித்து வாக்குவாதம் பண்ணவில்லை. பெலிஸ்தர்கள் நினைத்திருப்பார்கள், ஆபிரகாம் இறந்த பிறகு இந்த துரவுகளுக்கு யார் சொந்தம் பாராட்டி வருவார்கள் என்று. ஆனால், ஈசாக்கு அவைகளை மீண்டும் தோண்டி அவைகளை பயன்படுத்த ஆரம்பித்தான்.

ஒரு நல்ல ஊழியக்காரரின் தரிசனங்களும் செயல்பாடுகளும் கூட அவர் மரித்தப்பின் அப்படியே போய் விடக்கூடாது. அது தொடர்ந்து செயல்பட வேண்டும். மோசேயின் தலைமைத்துவத்துவத்தை யோசுவா தொடர்ந்ததுப்போல, எலியாவின் தரிசனத்தை எலிசா தொடர்ந்தது போல, நல்ல ஊழியரின் தரிசனங்கள் அவர்கள் மரிக்கும்போது, அவர்களோடு மண்ணோடு மண்ணாக போய் விடாமல் அவை தொடர்ந்து நடத்தப்பட வேண்டும்.

ஆனால், தன் தகப்பனின் துரவுகளை ஈசாக்கு தோண்டியபோது, அதை குறித்து வாக்குவாதம் செய்யாதவர்கள், அவன் புதிய துரவுகளை தோண்ட ஆரம்பித்த போது வாக்குவாதம் செய்ய ஆரம்பித்தார்கள். பழைய ஊழியரின் தரிசனங்கள் நல்லதுதான், ஆனால் தேவன் புதிய தரிசனங்களோடு கூட நாம் செயல் பட வேண்டும் என்றும் எதிர்ப்பார்க்கிறார். அப்போது எதிர்ப்புகள் வரத்தான் செய்யும். அவைகளையும் மீறி நாம் செயலாற்ற வேண்டும். ஐயோ, எதிர்ப்புகள் வருகிறதே என்று ஒன்றுமே செய்யாமல் இருக்கும்போது, அதினால் எந்த பயனுமில்லை.

நீங்கள் செயலாற்றி செல்லும்போதுதான் தேவனும் ஆசீர்வதிகக ஆரம்பிக்கிறார். ‘பின்பு அவ்விடம்விட்டுப் பெயர்ந்துபோய்,  வேறொரு துரவை வெட்டினான்; அதைக்குறித்து அவர்கள் வாக்குவாதம் பண்ணவில்லை; அப்பொழுது அவன்: நாம் தேசத்தில் பலுகும்படிக்கு, இப்பொழுது கர்த்தர் நமக்கு இடம் உண்டாக்கினார் என்று சொல்லி, அதற்கு ரெகொபோத் என்று பேரிட்டான்’ என்று பார்க்கிறோம். அவன் எதிர்ப்புகளை கண்டு சோர்ந்து போகாமல், முன்னோக்கி சென்று துரவை வெட்டினபோது, அவர்கள் வாக்குவாதம் பண்ணவில்லை. அப்போது தேவன் அவனை ஆசீர்வதிக்க ஆரம்பிக்கிறார். அவன் மகிழ்ந்து தேவன் அவர்களுக்கு இடம் உண்டாக்கினார் என்று அந்த துரவிற்கு ரெகொபோத் என்று பெயரிட்டான்.

கர்த்தருக்காக காரியங்களை புதிய தரிசனத்தோடு செய்யும் போது எதிர்ப்புகள் வரத்தான் செய்யும். அந்த எதிர்ப்புகளின் மத்தியிலும் மனம் தளராமல் கர்த்தருக்காக காரியங்களை செய்யும்போது, ஒரு நாள் வரும், எதிர்ப்பவர்கள் வாயடைத்து போவார்கள். தேவன் உங்களை பலுக செய்வார். அப்போது நீங்களும் ஆனந்தமாக ரெகொபோத் என்று ஆண்டவரை துதிக்க முடியும். ஆமென் அல்லேலூயா!

ஜெபம் : எங்கள் கன்மலையும் மீட்பருமாகிய நல்ல தகப்பனே, இந்த நல்ல நாளுக்காக உம்மை துதிக்கிறோம். அப்பா, நீர் கொடுக்கிற புதிய தரிசனங்களை நாங்கள், எங்களுக்கு எதிராக வரும் எதிர்ப்புகளை மீறி உமக்கென்று காரியங்களை சாதிக்க எங்களுக்கு உதவும்.  எத்தனை எதிர்ப்புகள் வந்தாலும் நீர் எங்களோடு கூட இருக்கிறீர் என்றும், எங்களை பலுக செய்வீர் என்றும் விசுவாசத்தோடும் புதிய நம்பிக்கையோடும் நாங்கள் உற்சாகமாக காரியங்களை செய்ய தேவன் தாமே எங்களுக்கு கிருபை செய்வீராக. எங்கள் ஒவ்வொருவருடைய வாழ்க்கையிலும் ரெகொபோத்தை கொடுத்து, எங்களை ஆசீர்வதிப்பீராக.  எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

பிசாசுக்கு எதிர்த்து நில்லுங்கள்..

ஜிம்பாவே நாட்டில் உள்ள விலங்குகள் சரணாலயத்தில் ஒரு குழுவினர் சுற்று பயணம் மேற்கொண்டனர். அவர்களை இன்னொசென்ட் என்பவர் வழிகாட்டியாக நடத்தி சென்று கொண்டிருந்தார்.

அவர்கள் வழிநெடுக மிருகங்களை பார்த்து கொண்டு வந்து கொண்டிருந்தபோது, ஒரு அரிய காட்சியை கண்டார்கள். ஒரு யானைக்குட்டியை பதினான்கு சிங்கங்கள் சூழ்ந்து கொண்டு அதை கொல்ல முயற்சி செய்து கொண்டிருந்தன.

அந்த காட்சியை அவர்கள் வீடியோ படம் எடுக்க ஆரம்பித்தனர். பதினான்கு சிங்கங்களில் மற்றவை சூழ்ந்து நிற்க, இரண்டு சிங்கங்கள் யானைக்குட்டியின் பின்பக்கத்தை கடித்து குதற முயற்சி செய்ய ஆரம்பித்தன…

வந்திருந்த குழுவினர் அதை தடுத்து நிறுத்த முயற்சி செய்ய நினைத்தாலும், அவர்களால் ஒன்றுமே செய்ய முடியாத நிலைமை! செய்யவும் கூடாது. ஏனென்றால் சிங்கங்கள் அவர்களை பதம் பார்த்து விடும். பரிதாபத்துடன் சிங்கங்கள் யானைக்குட்டியை தாக்க முயற்சிப்பதை பார்த்து கொண்டிருந்தனர். சிங்கங்கள் பின்பக்கமாக தாக்க முயன்றபோது, யானைக்குட்டி உதறி தள்ளி தப்பித்தது.

மீண்டும் அவை தாக்க முற்படும்போது, அவைகளை முட்டி தள்ளிற்று. மாறி மாறி நடந்த போராட்டத்தில் கடைசியில் யானைக்குட்டி விரட்ட சிங்கங்கள் தோற்றுப்போய் ஓடிப்போக தொடங்கின. கடைசியில் யானைக்குட்டி வெற்றி பெற்றது.

தனது முப்பது வருட வழிகாட்டி வேலையில் இதுதான் முதல்முறை இப்படி சிங்கங்கள் தோல்வியுற்றதை கண்டதாக இன்னொசென்ட் கூறினார். அந்த தைரியமான பலசாலியான யானைக்குட்டிக்கு ஹெர்குலிஸ் என்று பெயரிட்டனர்.

“தெளிந்த புத்தியுள்ளவர்களாயிருங்கள், விழித்திருங்கள்; ஏனெனில், உங்கள் எதிராளியாகிய பிசாசானவன் கெர்ச்சிக்கிற சிங்கம்போல் எவனை விழுங்கலாமோ என்று வகைதேடிச் சுற்றித்திரிகிறான்” (1பேதுரு 5:8)என்று வேதத்தில் வாசிக்கிறோம். அப்படி பிசாசானவன் சிங்கங்கள் யானைக்குட்டியை தாக்குவது போல கிறிஸ்துவை பின்பற்றுபவர்களை தொடர்ந்து வந்து தாக்க முயற்சிப்பான். ஆனால் அவனுக்கு எதிர்த்து நிற்கும்போது, நிச்சயமாக நாம் பெலனற்றவர்களாக இருந்தாலும் கிறிஸ்து நமக்கு கேடகமாக இருப்பதால் நாம் அவனை மேற் கொள்ள முடியும்.

நாம் நம்முடைய பெலத்தை மட்டும் சார்ந்து சத்துருவுடன் போரிட முடியாது. கர்த்தiர் சார்ந்து நாம் அவனை எதிர்த்து நிற்கும்போது, அவனை எளிதில் மேற்கொள்ள முடியும். சத்துருவானவன் வெள்ளம் போல வரும்போது ஆவியானவர் அவனுக்கு எதிராக கொடி ஏற்றுவார். அவனை மேற்கொள்ள பெலன் தருவார்.

கர்த்தருக்குள் இன்னும் அதிகமாக வளர வேண்டும், அவருக்காக கனிகொடுக்க வேண்டும், அவருக்காக வாழ வேண்டும் என்று தீர்மானிக்கிற ஒவ்வொருவரையும் விழுங்கும்படியாக, சத்துரு சுற்றி திரிந்தாலும், யானைக்குட்டி தனி ஆளாக சிங்கங்களை விரட்டி அடித்ததுப்போல நாம்; தேவனோடு இருந்தால் அவனை விரட்டி அடிக்க முடியும். வெற்றி என்றும் நமக்கே! ஆமென் அல்லேலூயா!

அந்தகார வல்லமைகளை 
தேவ பெலத்தால் முறியடிப்பேன்
இயேசுவின் இரத்தம் எந்தன் பாதுகாப்பு
பயமில்லை வெற்றி எனக்கே என்றும்
பயமில்லை வெற்றி எனக்கே
போராயுதம் தரிப்பேன் 
போர் செய்வேன் போர் செய்வேன்

ஜெபம்: எங்கள் அன்பின் பரலோக தகப்பனே, சத்துருவை எதிர்த்து நிற்கும்படியாக எங்கள் ஒவ்வொருவரையும் பலப்படுத்தும். யுத்தத்திற்கு எங்கள் கைகளை பழக்குவிக்கிறவரே சத்துருவோடு நாங்கள் செய்யும் யுத்தத்தில் யெகோவாநிசியாக நீர் எங்களோடு இருந்து வெற்றி பெற செய்வதற்காக உமக்கு ஸ்தோத்திரம். எங்கள் ஒவ்வொருவரையும் சத்துருவின் மேல் வெற்றி பெற செய்வதற்காக உமக்கு ஸ்தோத்திரம். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

பாவத்தை அறிக்கை செய்து விட்டுவிடுவோம்

தன் பாவங்களை மறைக்கிறவன் வாழ்வடையமாட்டான்; அவைகளை அறிக்கை செய்து விட்டுவிடுகிறவனோ இரக்கம் பெறுவான். – (நீதிமொழிகள் 28:13).

ஆப்பிரிக்க கண்டத்தில் எபோலா என்னும் வியாதி சமீபத்தில் அநேகரை தாக்கியது அனைவரையும் அறிந்ததே. ஒவ்வொரு நாடும் தங்கள் நாட்டிற்குள் வந்து விடக்கூடாது என்பதற்காக எத்தனையோ முயற்சிகள் மேற்கொண்டனர். அநேக வகுப்புகள் அதை எப்படி தடுப்பது என்பதை குறித்து எடுக்கப்பட்டது.

அதில் லைபீரியா என்னும் நாட்டில் அதிகமாக இந்த நோய் தாக்கியது. அப்போது அந்த வியாதி தாக்கின ஒரு பெண்ணை, டன்கன் தாமஸ் எரிக் என்பவர் மருத்துவமனைக்கு கொண்டு செல்ல உதவி செய்தார். மருத்துவமனையிலிருந்து திரும்பி வந்தவுடன் மிகவும் பெலவீனமாயிருந்த அப்பெண்ணை கரங்களில் தூக்கி கொண்டு வீட்டில் கொண்டு போய் விட்டார். அதற்கு பின் சில நாட்களில் அந்த பெண் இறந்து விட்டாள்.

டன்கன் நான்கு நாட்கள் கழித்து அமெரிக்காவில் உள்ள தன் குடும்பத்தோடு இணைந்து கொண்டார். பயங்கரமாக அந்த சமயத்தில் பரிசோதனை நடந்து கொண்டிருந்த நேரத்தில் விமான அதிகாரிகள் அவரிடம் எபோலா நோயுள்ள நோயாளியோடு தொடர்பு கொண்டிருந்தீர்களா? என்று கேட்டதற்கு இல்லவே இல்லை என்று பொய் சொல்லி விட்டார்.

2014ஆம் தேதி செப்டம்பர் மாதம் 24ம் தேதி எபோலா நோய்க்கான அறிகுறிகள் தென்பட மருத்துவமனைக்கு சென்றார். அவருக்கு வயிற்றுவலி, காய்ச்சல் போன்றவை இருந்தன. அங்கும் சமீபத்தில் எந்த நாட்டிலிருந்து வந்தீர்கள்? எபோலா நோயாளியிடம் தொடர்பு கொண்டீர்களா? என்று கேட்டதற்கு நான் லைபீரியா நாட்டிலிருந்து வந்தது உண்மைதான், ஆனால் எபோலா நோயாளிகளுடன் எந்த தொடர்பும் கொள்ளவில்லை என்று மறுபடியும் பொய் சொன்னார். எனவே அந்த மருத்துவமனையிலிருந்து மருந்து மாத்திரைகள் கொடுத்து அனுப்பி விட்டனர்.

பின்பு நான்கு நாட்கள் கழித்து, மிகவும் வியாதிப்பட்டு, மருத்துவமனைக்கு கொண்டு செல்லப்பட்டார். அவருக்கு எபோலா நோய் தாக்கியிருப்பது தெரிய வந்தது. தனிமைப்படுத்தப்பட்ட அறையில் தகுந்த சிகிச்சை பெற்றும், நேரம் கடந்த சிகிச்சையால் பலனின்றி அக்டோபர் மாதம் 8ம்தேதி காலமானார். இவர்தான் அமெரிக்காவில் எபோலா நோய் தாக்கி மரித்த முதல் நபர் ஆவார். அவருடன் நெருங்கி இருந்த 50 பேருக்கு தகுந்த சிகிச்சை கொடுக்கப்பட்டு நோய் பரவாதபடி தடுக்கப்பட்டது.

எபோலா எவ்வளவு பெரிய விளைவுகளை ஏற்படுத்தியது பாருங்கள். முதலிலேயே அவர் உண்மையை சொல்லியிருந்தால் அந்த நோய்க்கு தகுந்த சிகிச்சை அளித்து அவர் காப்பாற்றப்பட்டிருக்க கூடும்.

பிரியமானவர்களே தன் பாவங்களை மறைக்கிறவன் வாழ்வடையமாட்டான்; அவைகளை அறிக்கை செய்து விட்டுவிடுகிறவனோ இரக்கம் பெறுவான் என்று வேதம் கூறுகிறதல்லவா? நாம் நம்முடைய பாவங்களை மறைக்காமல் கர்த்தரிடம் அறிக்கை செய்து விட்டுவிடும்போது அவர் நம்முடைய பாவங்களை மன்னித்து நம்மை சுத்திகரிக்க வல்லமையுள்ளவராயிருக்கிறார். நாம் அவைகளை மறைத்து வைப்போமானால் நம் பாவங்கள் மன்னிக்கப்படாமல் நாம் நம்முடைய பாவங்களிலேயே மரித்துபோவோமானால் எத்தனை பரிதாபம்! நித்திய ஜீவனை இழந்து போவோமே!

“ நான் என் அக்கிரமத்தை மறைக்காமல்இ என் பாவத்தை உமக்கு அறிவித்தேன்; என் மீறுதல்களைக் கர்த்தருக்கு அறிக்கையிடுவேன் என்றேன்; தேவரீர் என் பாவத்தின் தோஷத்தை மன்னித்தீர்” (சங்கீதம் 32: 5) என்று சங்கீதக்காரன் சொல்வதை பார்க்கிறோம். நாம் அறிக்கை செய்யும்போது தேவன் நம் பாவத்தின் தோஷத்தை மன்னிக்கிறார். அல்லேலூயா!

ஒவ்வொரு நாளும் இரவு படுக்கும்போது தேவனிடம் அந்த நாளில் நாம் தெரிந்தும் தெரியாமலும் செய்த பாவங்களை அறிக்கையிட்டு பாவ மன்னிப்பின் நிச்சயத்தோடு படுக்கைக்கு செல்வோம். கர்த்தரின் வருகை அந்த இரவில் இருக்குமென்றாலும் நாம் அவரோடு எடுத்துக் கொள்ளப்படுவோம். ஆமென் அல்லேலூயா!

பாவத்தின் பாரத்தினால் தவித்திடும் பாவி என்னை
உம் சிலுவை பிரவாகத்தால் தேற்றிடும் இயேசுநாதா.

கெட்ட குமாரனை போல் கதிகெட்டு அலைந்தேனையா
கள்ளனுக்கு அருள்செய்த நீர் தள்ளாதீர் சிலுவை நாதா

ஜெபம்:  எங்கள் அன்பின் பரலோக தகப்பனே எங்கள் பாவங்களை நாங்கள் அறிக்கை செய்து அவற்றை விட்டுவிட கிருபை தாரும். நாங்கள் அறிக்கை செய்யும்போது அவற்றை மன்னித்து எங்களை நீர் சுத்திகரிப்பதற்காக உமக்கு கோடி ஸ்தோத்திரம். இயேசுகிறிஸ்துவின் இரத்தம் சகல பாவங்களையும் நீக்கி எங்களை சுத்திகரிக்க வல்லமையுள்ளதாக இருக்கிறபடியால் எங்கள் பாவங்களிலே நாங்கள் வாழாதபடி அவற்றை உம்மிடம் அறிக்கையிட்டு, பாவ மன்னிப்பின் நிச்சயத்தை பெற்று கொள்ள உதவி செய்யும். எல்லாவற்றையும் இயேசுகிறிஸ்துவின் இனிய நாமத்தில் கேட்டு கொள்கிறோம் எங்கள் நல்ல தகப்பனே ஆமென்.

இழந்து போனதை தேடுவோம்..

இயேசு இழந்துபோனதைத் தேடவும் இரட்சிக்கவுமே மனுஷகுமாரன் வந்திருக்கிறார் என்றார். – (லூக்கா 19:10).

2014ஆம் ஆண்டு மார்ச் மாதம் மலேசிய விமானம் காணாமற் போய் அது கிடைக்காமற் போனது அனைவரும் அறிந்ததே. அதை தேடும் பணி ஒரு வருடத்திற்கு மேல் நடைபெற்றது. எத்தனையோ கோடி ரூபாய்கள் செலவானது. பன்னாட்டு படைகள் தேடும் முயற்சியில் இறங்கின.

அப்படி அவர்கள் தேடும் போது அநேக பொருட்கள் கிடைத்தன. ஆனால் காணாமற்போன பயணிகளின் உறவினர்களுக்கு அது பிரயோஜனமாக இருக்கவில்லை. ஆனால் அப்படி தேடினபோது உலகத்தின் பலகோடி பேருக்கு அது பிரயோஜனமாயிருந்தது.

எப்படி என்றால், தேடும்போது கடலின் அடியில் இதுவரை கண்டுபிடிக்கப்படாத உயரமான மலைகளும், குழிகளும் இருப்பதை கண்டுபிடித்தனர். அதை குறித்த வரைப்படங்களை விரைவில் வெளியிட இருக்கிறார்கள். கடலினடியில் ஆராய்ச்சி செய்யும் விஞ்ஞானிகளுக்கு அது மிகப்பெரிய வரப்பிரசாதமாக இருக்க போகிறது.

இதுதவிர கடலுக்கடியில் பூமியதிர்ச்சி ஏற்படும்போது, சுனாமிகள் உண்டாகும் இடஙகள் எதுவென்று கண்டுபிடிக்க இந்த தேடல் உதவியது. எங்கெங்கே கடலில் சுழற்சி இருக்கிறது, எந்த பகுதிகளில் கடல் நீரோட்டம் அதிகமாக இருக்கிறது என்பதை எல்லாம் துல்லியமாக கண்டுபிடித்தனர். இதனால் கடலில் பயணிப்போர், மீன்பிடிப்போருக்கு மிகவும் வசதியாக இருக்கும்.

இதற்கு பின்பு கடலில் விழுந்து காணாமற்போன ஏர் ஏசியா விமானத்தை எளிதில் கண்டுபிடிக்க இந்த தேடுதல் மிக அதிக அளவில் உதவினது.

மலேசிய விமானம் மறைந்தது உறவினர்களுக்கும், நண்பர்களுக்கும் மிகவும் வருத்தமாக இருந்தாலும், அதினால் அநேக கண்டுபிடிப்புகளை நடத்த அது உதவியது எத்தனை ஆச்சரியம்! மட்டுமல்ல, பன்னாட்டு படையினரிடையே ஒரு ஒற்றுமையையும், ஒழுக்கத்தையும் அது ஏற்படுத்தியது என்று ஒரு அதிகாரி கூறினார்.

கடலுக்கடியில் உள்ள உலகத்தின் எட்டு சதவிகிதத்தைதான் மனிதன் இதுவரை கண்டுபிடித்திருக்கிறான். இன்னும் கண்டுபிடிக்காத இடங்கள் 92 சதகிவிதமாகும்.

காணாமற் போன ஆத்துமாக்களை தேடி நம்முடைய தேடுதலும் இன்றும் நடந்து கொண்டுதான் இருக்கிறது. அநேக ஊழியர்கள் இன்னும் கர்த்தருடைய வார்த்தையை விதைத்து கொண்டுதான் இருக்கிறார்கள். நாம் அப்படி காணாமற் போன ஆத்துமாக்களை தேடி செல்லும்போது, மற்றவர்கள் அந்த வசனத்தை கேட்டு இரட்சிக்கப்படலாம். ஆகையால் தொடர்ந்து நாம் தேடுவோம். கர்த்தரின் வார்த்தைகளை விதைப்போம். ஆவியானவர் கிரியை செய்வார்.

இந்த கடைசி நாட்களில் எல்லா மீடியாக்கள் மூலமாகவும் கர்த்தருடைய வார்த்தை கடந்து சென்று கொண்டிருக்கிறது. எப்படியாவது தாங்கள் அனுப்பும் ஒரு வசனத்தின் மூலம் யாராவது தொடப்பட வேண்டுமே என்று ஒவ்வொருவரும் வார்த்தைகளை அனுப்பி கொண்டே இருக்கிறார்கள். ஒவ்வொருவரின் தேடுதலும் ஏதாவது ஒரு வகையில் யாரையாவது தொடும். காணாமற் போன ஒரு ஆட்டை தேடின மேய்ப்பனை போல கர்த்தராகிய இயேசுவும் நம் ஒவ்வொருவர் மூலமாகவும் ஒவ்வொரு ஆத்துமாவையும் தேடுகிறார். அவர் கண்டுபிடிக்கதக்கதாக நாம் அனைவரும் அவருக்கு உதவி செய்வோம். ஆத்துமாக்கள் பரலோகத்தை நிரப்ப கர்த்தர் கிருபை செய்வார். ஆமென் அல்லேலூயா!

காணாத ஆட்டின் பின்னே 
கர்த்தர் கண்ணீருடன் அலைந்தார்
அன்போடு உன்னை அழைக்கிறாரே
இன்றே திரும்பி நீ வா

முள்ளும் புதரும் காடும் மலையும்
உள்ளம் உடைந்தேசு தேடுகிறார்
சிற்றின்ப சேற்றினில் நீ சிக்கினதால்
சாத்தான் வலையில் நீ சிறையாகினாய்

ஜெபம்:  எங்கள் அன்பின் பரலோக தகப்பனே, இந்த நாளிலும் இழந்து போனதை தேடவும், இரட்சிக்கவும் வந்த கிறிஸ்துவின் தேடுதல் இருக்கிறபடியால் நாங்களும் வாஞ்சையோடு அப்படிப்பட்ட ஆத்துமாக்களை தேடி கர்த்தரிடத்தில் கொண்டு சேர்க்க கிருபை செய்யும். ஒரு ஆத்துமாவை தேடி அது கிடைக்காததால் நாங்கள் சோர்ந்து போய் விடாதபடி, தொடர்ந்து தேடும்படியாக எங்களை பெலப்படுத்தும். இயேசுகிறிஸ்துவின் இனிய நாமத்தில் ஜெபிக்கிறோம் நல்ல தகப்பனே ஆமென்.

ஜீவன் தப்ப ஓடிப்போ

அவர்களை வெளியே கொண்டுபோய்விட்டபின்பு, அவர்: உன் ஜீவன் தப்ப ஓடிப்போஇ பின்னிட்டுப் பாராதே; இந்தச் சமபூமியில் எங்கும் நில்லாதே; நீ அழியாதபடிக்கு மலைக்கு ஓடிப்போ என்றார். – (ஆதியாகமம் 19:17).

பிரச்சனைகளின் நிமித்தமாக வேறு நாடுகளில் இருந்து சொந்த நாட்டிற்கு தன்னுடைய ஜனங்களை அதிகமாய் கொண்டு வந்த நாடு எது தெரியுமா? நமது நாடான இந்தியாவேதான். அதினால் அது சாதனை படைத்து கின்னஸ் புத்தகத்திலும் வெளிவந்துள்ளது. 1,70,000 பேரை 488 விமானங்கள் மூலம் இந்தியா கொண்டு வந்து சேர்த்துள்ளனர்.

1990ஆம் ஆண்டு ஈராக் தேசம் குவைத் நாட்டை கைப்பற்றியபோது, எதிர்பாராதவிதமாக நடந்த இந்த ஊடுருவலின் நிமித்தம் எல்லா நாட்டினரும் திகைத்தனர். என்ன செய்வது என்று தவித்தனர். உணவு பஞ்சம், குழந்தைகள் வைத்திருப்போர் பால் வாங்க முடியாமல் தவித்தனர்.

இச்சண்டையில் பல நாடுகள் தலையிட்டன. அவரவர் தங்கள் தேசத்து மக்களை தங்கள் நாடுகளுக்கு கொண்டு சென்றனர். ஆனால் இந்தியர்கள் மற்ற நாட்டினரை விட அதிகம் இருந்தனர். ஆகையால் குவைத்தில் இருந்த இந்தியர்களை பத்திரமாக தாயகம் கொண்டு சேர்க்க வேண்டிய பொறுப்பு அரசாங்கத்திற்கு வந்தது. அதற்காக பல யுக்திகளை கையாள வேண்டி வந்தது.

குவைத் நாடும் வேண்டும், ஈராக்கையும் பகைத்து கொள்ள கூடாது என்று தீர்மானித்த இந்தியா அந்த ஆக்கிரமிப்பை எதிர்த்து எந்த செய்தியையும் வெளியிடவில்லை. அப்படி செய்திருந்தால் ஈராக் இராணுவம் இந்தியர்களை வெளியே விட அனுமதித்திருக்காது.

ஆனால் சமயோசிதமாக முடிவெடுத்து, ஈராக் அதிபர் சதாம் ஹீசைனிடம் பேசி, சம்மதம் வாங்கி, தன் மக்களை தாயகம் கொண்டு வந்தது. கைப்பற்றிய 14 நாட்களுக்குள் இந்த சம்மதத்தை இந்திய அரசாங்கம் பெற்று கொண்டது. அப்படி வந்தவர்களில் எங்கள் குடும்பமும் ஒன்று. கர்த்தர் அதிசயவிதமாய் இரண்டு மாத குழந்தையாக இருந்த எங்கள் மகனையும், எங்களையும் பத்திரமாக தாயகம் கொண்டு வந்து சேர்த்தார். அல்லேலூயா!

சம்மதம் வாங்கின இந்திய அரசாங்கத்திடமிருந்து நாம் கற்று கொள்ள வேண்டிய பாடம் உண்டு. அவசரப்பட்டு, பதறி வார்த்தைகளை உதிர்த்த விட்டால் சில நேரங்களில் நினைத்த நல்ல காரியங்கள் நடைபெறாமலேயே போய் விட நேர்ந்து விடும். எனவே ஞானமாய் பேசி பிரச்சனைகளை சமாளிக்க பழகி கொள்ள வேண்டும். அதை ஞானமாய் நடத்தின இந்திய அரசாங்கத்தை நாம் பாராட்டத்தான் வேண்டும். அந்த சமயத்தில் திரு. குஜரால் அவர்கள் வெளியுறவு அமைச்சராக இருந்தார். அவர் குவைத்திற்கு வந்து காரியங்களை செவ்வைப்படுத்தினார்.

பதினான்கு நாட்களில் சம்மதம் பெற்று, தன் மக்களை கொஞ்சம் கொஞ்சமாக வெளியேற்ற தொடங்கியது இந்தியா. முதலில் கர்ப்பிணி பெண்கள், வயதானவர்கள், சிறு குழந்தை வைத்திருப்போர் என்று குழுக்களாக பிரித்து அனுப்ப தொடங்கினார்கள்.

தங்கள் குடும்பத்தை யோசித்து அநேகர், தங்கள் பொருட்கள், சம்பாதித்து வைத்தவை, வங்கியில் போட்டு வைத்தவை என்று எதையும் பொருட்படுத்தாமல், உயிர் தப்பினால் போதும் என்று, கையில் கிடைத்ததை எடுத்துக் கொண்டு, நாட்டை விட்டு வெளியேற தொடங்கினார்கள். நாங்கள் கையில் குழந்தையுடன், இரண்டு சிறிய பெட்டிகளில் எங்கள் துணிகள் சிலவற்றை எடுத்து கொண்டு புறபட்டோம். ஒரு வருடம் கழிந்து வந்து பார்த்தபோது எங்கள் வீடு இருந்தது. ஆனால் எந்த பொருட்களும் இல்லை.

ஆனால் சிலர், பல ஆண்டுகளாக தாங்கள் சம்பாதித்த பொருட்களையும், பணத்தையும் விட்டு விட்ட மனமில்லாமல், மரித்தாலும் அங்கேயே மரிப்போம் என்று சொல்லி அங்கேயே இருந்து விட்டனர். குண்டு மழை பொழிந்து, பாதி குவைத்தை அழித்து விட்டாலும், அவர்கள் அங்கேயே இருந்து விட்டனர்.

சிலருக்கு அங்கிருந்த எண்ணெய் கிணறுகள் எரிந்தபடியால் அதிலிருந்து புறப்பட்ட கருமையான வாயுக்களை உட்சுவாசித்து, புற்று நோய் வந்தது. அநேக சுவாச சம்பந்தப்பட்ட, தோல் சம்பந்தப்பட்ட வியாதிகளுக்குள்ளாயினர்.

இச்சம்பவங்கள் நமக்கு எதை ஞாபகப்படுத்துகிறது? லோத்தின் மனைவி தான் இருந்த நாட்டை விட்டு போக முடியாமல் பின்னிட்டு பார்த்து உப்புதூணாகி போனாள் அல்லவா?

அதை போன்று இந்த நாட்களிலும் நாம் நம் சம்பாத்தியம், உலக பொருட்கள் தான் முக்கியம் என்று அதையே பிடித்து கொண்டு, கர்த்தரை தேடாமல் போனால் அவருடைய வருகையில் கைவிடப்படுவோம் என்பது நிச்சயம். நாம் வாழ்வதற்கு பணம் முக்கியம். அது இல்லாமல் வாழ முடியாது. ஆனால் அதையே குறிக்கோளாக நம் வாழ்க்கை இருந்தால் நமது மறுமையின் வாழ்வு அர்த்தமற்றதாக, பிரயோஜனமற்றதாக போய் விடும்.

கர்த்தரை கண்டடையத்தக்க சமயத்தில் அவரை தேடுவோம். அவரை பற்றி கொள்வோம். இம்மைக்காகவே நாம் வாழாமல், மறுமையை நினைத்து அங்குதான் யுகாயுகமாக வாழ்வோம் என்பதை நினைத்து, நம்முடைய வாழ்க்கையை கர்த்தருக்கு பிரியமாக வாழ பழகி கொள்வோம். கர்த்தராகிய இயேசுகிறிஸ்து சீக்கிரம் வருகிறார். ஆமென் அல்லேலூயா!

கட்டின வீடும் நிலம் பொருளும் 
கண்டிடும் உற்றார் உறவினரும் 
கூடுவிட்டு உன் ஆவி போனால் 
கூட உன்னோடு வருவதில்லை

வருவாய் தருணமிதுவே அழைக்கிறாரே
வல்ல ஆண்டவர் இயேசு உன்னை

ஜெபம்: எங்கள் அன்பின் பரலோக தகப்பனே, இந்த உலகமும் அதன் ஆசை இச்சைகளும் ஒரு நாளில் அழிந்து போகுமென்று நாங்கள் உணர்ந்து, தேவனுடைய இராஜ்யத்தையும் அவருடைய நீதியையும் தேட எங்கள் ஒவ்வொருவருக்கும் உதவி செய்யும். கர்த்தரை அறிந்து கொண்ட நாங்கள் அதோடு நின்று விடாதபடி, கர்த்தருக்குள் வளர, கனி கொடுக்க கிருபை செய்யும். இயேசுகிறிஸ்துவின் இனிய நாமத்தில் வேண்டி கொள்கிறோம் எங்கள் நல்ல தகப்பனே ஆமென்

பொறுமையாயிருப்போம்

ஒருவனையும் தூஷியாமலும், சண்டைபண்ணாமலும். பொறுமையுள்ளவர்களாய் எல்லா மனுஷருக்கும் சாந்தகுணத்தைக் காண்பிக்கவும் அவர்களுக்கு நினைப்பூட்டு. – ( தீத்து 3:2).

2014ஆம் ஆண்டு தென் கொரியாவின் இன்ச்சானில் நடைபெற்ற ஆசிய விளையாட்டு போட்டிகளில் இந்தியாவின் சார்பில் கலந்து கொண்ட அநேகரில் சரிதா தேவியும் ஒருவர். இவர் அறுபது கிலோ எடை பிரிவு குத்துச்சண்டை வீராங்கனையாவார். இவருக்கும தென் கொரியாவின் ஜீனா பார்க் என்பவருக்குமிடையே அரையிறுதிப் போட்டி நடந்தது. அதில் சரிதாவுக்குத்தான் வெற்றி என்று எல்லாரும் நினைத்து கொண்டிருந்தனர்.

ஆனால் நடுவர்கள் ஜீனா பார்க் வென்றதாக அறிவித்தனர். உடனே இந்தியரின் குத்துச்சண்டை தலைமை பயிற்சியாளர் அதற்கு எதிர்ப்பு தெரிவித்தார். சரிதா அழ ஆரம்பித்தார். அதிகாரிகள் மேல் முறையீடு செய்தனர். விளையாட்டு போட்டிகளில் நடுவர்களின் தீர்ப்பே இறுதியானது என்பதால் மேல் முறையீடும் நிராகரிக்கப்பட்டது.

பரிசளிப்பு நிகழ்ச்சி தொடங்கியது. பரிசளிப்பு மேடையில சரிதா தேம்பி தேம்பி அழுதவாறு நின்று கொண்டிருந்தார். சரிதாவிற்கு வெண்கலப்பதக்கம் அணிவிப்பதற்காக குழுவினர் வந்தனர். முதலாவது அதை கழுத்தில் அணிய மறுத்தார். பின்னர் அதை கைகளில் வாங்கி கொணடு நேரடியாக ஜீனா பார்க்கிடம் சென்று அவரை கட்டி பிடித்து விட்டு பதக்கத்தை அவரிடம் கொடுத்து விட்டார்.

அங்கு என்ன நடக்கிறதென்றே நிகழ்ச்சி ஒருங்கிணைப்பாளர்களாளல் புரிந்து கொள்ள முடியவில்லை. பின்னர் சரிதா அங்கிருந்து புறப்பட்டு சென்றார். சற்றும் எதிர்ப்பாராமல் நடைபெற்ற இந்த குழப்பத்தால் அதிர்ந்து போன தென் கொரிய வீராங்கனை தனக்குரிய வெள்ளிப் பதக்கத்தை வைத்து கொண்டு சரிதா கொடுத்த வெண்கலப் பதக்கத்தை நிகழ்ச்சி நடந்த இடத்தில் கீழே வைத்து விட்டு, அவரும் நிகழ்ச்சி முடிந்தவுடன் வெளியேறினார்.

போட்டிகளில் என்ன நடந்திருந்தாலும் பதக்கம் வழங்குமிடத்தில் சரிதா நடந்து கொண்ட விதம் வருந்தத்தக்கது என்றும், மற்ற போட்டியாளர்களும் சரிதாவின் தவறான முன்னுதாரணத்தை பின்பற்றி, இதுபோல தவறான முறையில் எதிர்ப்பை காட்டகூடும் என்று போட்டிகளின் கண்காணிப்பாளர் கூறினார்

இந்த நிகழ்ச்சி கெட்ட குமாரன் சரித்திரத்தில் வரும் மூத்த சகோதரனின் மனநிலையை படம் பிடித்து காட்டுகிறது. இளைய குமாரனுக்கு தகப்பன் விருந்து செய்ததை கண்ட மூத்த மகன் வீட்டுக்குள் வர விருப்பமில்லாமல், வேசிகளினிடத்தில் சொத்தை அழித்து போட்டு வந்திருக்கிற இவனுக்கு கொழுத்த கன்றை அடித்து விருந்து செய்கிறீரே என்று கேட்டு தன் இருதயத்தை வெளிப்படுத்தினது போல இச்சம்பவம் உள்ளது.

பிரியமானவர்களே, நாமும் கூட நாம் வேலை செய்யும் இடங்களில், சபைகளில், நம்மை அநியாயமாக நடத்தும்போது, கோபமடைந்து நம் வெறுப்பையும், நமது எதிர்ப்பையும் வெளிப்படுத்துகிறோம். நாம் செய்தது சரிதான் என்று நியாயப்படுத்த முயற்சிக்கிறோம். ஆனால் அது சில வேளைகளில் ஏற்றுக்கொள்ளப்படுகிறது. சில வேளைகளில் ஏற்றுக் கொள்ளப்படுவதில்;லை. அதனால் சோர்ந்து போய் விடுகிறோம்.

இயேசுகிறிஸ்துவை சிலுவையில் அறைந்தது எந்த வகையில் நியாயம்? பாவமே செய்யாத அவரை பொய் குற்றம் சாட்டி சிலுவையில் அறைந்தார்கள் அல்லவா? ஆனால் அவர் அந்த சமயத்தில் அதை எதிர்த்து போராடவில்லை. தம் பக்கம் இருக்கும் நியாயத்தை எடுத்து சொல்லவில்லை என்பதை நாம் அறிவோம். தன்னை மயிர்கத்தரிக்கிறவனுக்கு முன்பாக வாய்திறவாதிருக்கிற ஆட்டை போல அமைதியாக இருந்தார் என்று வேதம் கூறுகிறது. தீர்க்கதரிசனங்களின் நிறைவேறுதலுக்காகவும், அவர் நமக்காக சிலுவையில் மரித்து, அவருடைய இரத்தத்தால் நம் பாவங்கள் கழுவப்பட வேண்டும் என்பது உண்மைதான். ஆனால் அவரை சிலுவையில் அறைந்ததற்கான உலகப்பிரகாரமான காரணங்கள் பொய்யான குற்றச்சாட்டுகளாகும்.

கிறிஸ்து அவர்கள் என்று சொல்லப்படும் கிறிஸ்தவர்களும் அவருடைய அடிச்சுவடியை பின்பற்றுகிறவர்களாக இருக்க வேண்டும். நம் பக்கம் இருக்கும் நியாயத்;தை எடுத்து சொல்லலாம். ஆனால் அதற்காக தேவையற்ற காட்சிகளை நாம் ஏற்படுத்த கூடாது.

கிறிஸ்துவிலிருந்த பொறுமை நமக்கும் வரட்டும். பொறுமையினால் நாம் சத்துருவை வெல்லுவோம். சரியான நேரத்தில் சரியான நியாயம் கிடைக்க தேவன் நமக்கு கிருபை செய்வார். ஆமென் அல்லேலூயா!

இரக்கம் உள்ளவரே மனதுருக்கம் நிறைந்தவரே
நீடிய சாந்தம் பொறுமை அன்பு நிறைந்து வாழ்பவரே
என் இயேசு இராஜா ஸ்தோத்திரம் 
ஸ்தோத்திரமே ஸ்தோத்திரமே உயிருள்ள நாளெல்லாமே

ஜெபம்: எங்கள் அன்பின் பரலோக தகப்பனே, எங்களில் அநேகருக்கு பொறுமை என்ற குணமே இல்லை தகப்பனே. பொறுமையற்றவர்களாக வாழ்ந்து கொண்டிருக்கிற எங்களுக்கு பொறுமையான குணத்தை கற்றுதாரும். எங்களுக்கு விரோதமாக காரியங்களை செய்கிறவர்களை பொறுமையோடு சகிக்க எங்களுககு உதவி செய்யும். பழிக்கு பழி என்று போகாமல், பொறுமையோடு நீர் நீதி செய்வீர் என்று உம்மிடத்தில் வைத்து விட கிருபை தாரும். இயேசுகிறிஸ்துவின் இனிய நாமத்தில் ஜெபிக்கிறோம் நல்ல தகப்பனே ஆமென்.